Home» Music »Feature

लौ यस पाला पनि बचे !

प्रशान्त तामाङलाई अब कसले पो नचिन्ला ! सबैभन्दा अनौठो मोड आएको छ, इण्डियन आइडलमा यतिबेला । प्रशान्त तामाङ, उत्कृष्ट तीन बन्न पुगेका छन् । भनिन्छ, उनको भोट इण्डियन आइडलको इतिहासमा कुनै प्रतियोगीको सन्दर्भमा सबैभन्दा बढी खसेको भोट हो । खसेका १५ लाख भोट मध्ये आधा त उनकै मात्र थियो भनी केहीको दाबी छ ।

केही समय अघिसम्म प्रशान्तको गायन मन नपराउनेहरु पनि उत्कृष्ट तीनमा आइसकेपछि अब उनलाई इण्डियन आइडल बनाउनै पर्छ भन्नेहरुको कमी छैन । तर यो कुरा सत्य हो, उत्कृष्ट १० मा छानिएका प्रतियोगीमध्ये उनी सबैभन्दा कमजोर गायक चाहिँ पक्कै हुन् । तर अब यो कुराको महत्व छैन, महत्व के कुराको छ भने अब प्रशान्त तामाङ इण्डियन आइडोलको ताज नजिक छन् ।

अहिले गुगलमा उनको नाम मात्र टाइप गर्ने हो भने एक सेकेण्डभित्र १७ हजार २ सय पेजहरु देखाउँछ । यसबाट थाहा हुन्छ, उनी कति लोकप्रिय भइसके ! प्रशान्त तामाङलाई नै माया गरेर बनाइएको एउटा ब्लग साइटले प्रशान्त यति धेरै लोकप्रिय हुनुका केही कारणहरु उल्लेख गरेको छ, जुन मलाई पनि रोचक लाग्यो ।

१. न्यायाधीशहरुको उनीप्रतिको बेलगाव
प्रख्यात कवि जावेद अख्तरलाई उनको स्वर मन पर्दैन । उदितनारायण झाले पनि उनलाई प्रशंसा गर्न कञ्जुस्याइँ गरे । अनु मल्लिकले त एक पटक प्रशान्तको यति बेइज्जति गरे कि चुरोट खाँदिनँ भनेर भन्दा पनि उनी मान्न तयार थिएनन् । सबैको प्रशंसा गर्ने अलिशा चिनोयले चाहिँ तुलनात्मक रुपमा उनको बारेमा उति नराम्रो भनेकी छैनन् तर पनि उनको बेलाबेलामा खप्की प्रशान्तले खाइरहेकै हुन् ।

बेला न कुबेला न्यायाधीशहरुको खप्कीका कारण पनि प्रशान्तलाई माया गर्नेहरुको संख्या बढेको हो ।

२. भारतीय प्रहरीको बढ्दो अलोकप्रियता
भारतीय प्रहरीको वास्तवमै इज्जत घट्दै गइरहेको छ । यस्तो अवस्थामा भारतीय प्रहरीमा काम गर्ने एउटा जवान, कसैले सोच्दै नसोची उत्कृष्ट १० मा छानिन पुग्यो । कलकत्ता प्रहरीका यी सिपाही सन् २००२ मा आफ्ना बाबुको मृत्युपछि जागीर खान पुगेका थिए र उनको गायकीलाई गाउँगाउँमा स्वास्थ्य, सरसफाईलगायत अन्य किसिमका जनजागरणका लागि उपयोग गरिँदै आएको थियो ।

भारतीय प्रहरीको इमेजलाई इण्डियन आइडोलजस्तो लोकप्रिय कार्यक्रमका मार्फत् उज्यालो बनाउन सकिन्छ भन्ने सोच्नेहरुको सहयोग पनि प्रशान्तका लागि सफलीभूत रह्यो ।

३. भारतीय नेपालीको गोर्खाली छवि
भारतीय नेपालीहरुले सन् १९४७ को हिन्दू-मुस्लिम दङ्गालगायत विभिन्न समयमा विभिन्न किसिमले भारतको रक्षाका लागि अनेक काम गरेका छन् । तर भारतले भारतीय नेपालीहरुलाई मात्र सिपाही या सेना या गोर्खाका रुपमा मात्र देखेको छ । गोर्खाभन्दा पनि अरु केही प्रतिभा छ भनेर भारतीय नेपालीले देखाउन जरुरी थियो । यही कारणले पनि प्रशान्तमा आफ्नो छवि देखेपछि भारतीय नेपाली अथवा नेपालका नेपालीहरुले पनि प्रशान्तलाई इण्डियन आइडोल बनाउनु पर्छ भन्ने सोच राखेको देखिन्छ ।

४. दार्जिलिङप्रति भारतको हेपाहा नीति
सन् १९८० को दशकमा गोर्खाल्याण्ड अभियान चल्दा यो अभियानलाई यति नमज्जाले तुहाइयो कि यो तुहाईले भारतीय नेपालीहरुको नूर गिर्‍यो । दार्जिलिङमा प्रशस्त सम्भावना हुँदाहुँदै पनि केन्द्रीय सरकार र पश्चिम बंगाल सरकारको नजरमा यो उत्पादनमूलक ठाउँ हो भन्ने भन्ने कुरा बिर्सिइयो । कतिसम्म भने झारखण्ड, उत्तराञ्चलजस्ता नयाँ प्रदेशहरुको जीवनस्तर दिनप्रतिदिन बढ्दो छ भने पूरै दार्जिलिङ खण्ड भने 'चम्किलो भारत' (साइनिङ इण्डिया) को अङ्ग बन्न सकेको छैन । प्रशान्तलाई अगाडि ल्याउनुमा यो किसिमको राजनीतिक कारण पनि एउटा प्रमुख कारण हुन सक्छ ।

५. प्रशान्तको मीठो व्यवहार
यत्रो ठूलो कार्यक्रम अवधिभर प्रशान्तका बारेमा कसैले नराम्रो कुरा गरेन । प्रशान्तको नम्र व्यवहार, सहयोगी भावना र सुरिलो स्वरका कारण पनि उनलाई यति माथि आउन सहयोग गर्‍यो । केही त कतिसम्म भन्छन् भने उनको मुस्कान साह्रै 'ज्यानमारा' छ !

यी मुख्य पाँच कारणले प्रशान्तलाई इण्डियन आइडोल बनाउन कसैले पनि रोक्दैन । यसमा तपाइँको भन्नु के छ ?






























 
Click Here To Read Previously Posted Article    Click Here To Read Next Article          
 
More on Feature
Related Tags:
उपलब्धि रिलिज लुकेका कुरा क्या बात ! कीर्तिमान तातोपीरो गायिका प्रेम र विवाह रुचि कन्सर्ट सङ्गीतकार नेपाली तारा हल्ला भिडन्त गीतकार पेज थ्री ट्रयाक बाहिर गायक विचार समुद्रपार
Browse Tags in Other Group
 
 
Tags in City Sightings
festival releases celebrity party events story wedding bandhs & protests bizarre traffic real picture hi-life city beauty pageant travel culture awards
Browse all Tags in Group
Tag groups: cinema, city sightings, city updates, fashion & grooming, health, misc, music, relationship, technology, television, weird & interesting,