Home» City Life »Updates

संविधानसभा र षडयन्त्रको गन्ध


यो त पक्का नै छ, राजधानीमै बम पड्किनु र त्यसका कर्ताहरुका बारेमा पत्ता नलाग्नु वा सरकारले यसबारेमा स्पष्ट बोल्न नचाहनु अनि कपिलवस्तुमा पूर्व माओवादी प्रतिकार समितिका सदस्य मोहिन खाँको हत्या हुनु र उनको हत्या लगत्तै हिन्दू-मुस्लिम दङ्गा फैलिनु यो फरक फरक घटना नहुन सक्छ ।

जब-जब नेपालमा नेपालीहरु आफैँले केही महत्वपूर्ण निर्णयमा सहभागिता जनाउन खोज्छन्, त्यतिबेला अनेक घटना घट्न पुग्छन् । ती घटना कहिले दवावका रुपमा राजनीतिक हस्तक्षेपकै कारणले हुन पुग्छन् त कहिले यस्तै अनेक थरिका हत्या र त्यसपछिका श्रृङ्खलाबद्ध तोडफोड र कार्यक्रमले ।

प्रधानमन्त्री गिरिजाप्रसाद कोइराला यतिबेला तनावमा छन्, तनावको कारण छ र त्यो कारण के भने यदि मंसीर ६ मा संविधानसभाको निर्वाचन भएन भने गिरिजा बाबुले नेतृत्व गरेको सरकारको वैधानिकता सकिने भनाइ भारतीयहरुको छ । भारतीयहरुको यो भनाइले नेपालमा भारतीय हस्तक्षेपको पराकाष्ठा देखाउँछ ।

धेरैलाई थाहा नहुन सक्छ, तराइका अधिकांश मुस्लिम समुदाय भारतीय चलखेलकै उपज हो । भन्न के खोजिएको भने जब बंगलादेशमा क्रान्ति भयो, यो छुपेको छैन कि त्यसमा भारतीय जासूसी संस्था 'र'को ठूलो हात छ । त्यो क्रान्तिताका बंगलादेशबाट ठूलो संख्यामा मुस्लिम समुदायहरु पाकिस्तान जान भनी नेपाल-भारत बोर्डर हुँदै निस्किएका थिए । तर अधिकांश मुस्लिम समुदाय नेपालको त्यसबेलाको शान्त अवस्थाबाट मोहित भई यहीँ स्थायी डेरा जमाए । यी मुस्लिम समुदाय राजनीतिक, सामाजिक र अन्य पहुँचबाट टाढा छ । ज्यादै निम्नस्तरको जीवनमा बाँचिरहेका यी मुस्लिमहरुलाई कहिलेकाहीँ पाठशाला र मस्जिद निर्माणका लागि परदेशका मुस्लिमहरुले सघाइरहेका छन् । शान्त मुस्लिम समुदायलाई पछिल्लो समयको वैदेशिक रोजगार र शिक्षाका कारण आफूहरुको पछौटेपनको कारण थाहा पाइरहेका छन् । र, तिनलाई यो पनि थाहा छ कि नेपाल सरकारले उनीहरुलाई जति दिन सक्थ्यो, दिएन ।

यो तथ्यतर्फ नेपाल सरकारले पर्याप्त रुपमा ध्यान पुर्‍याउन नसके पनि भारतले पहिलेदेखि नै यहाँ नजर दिइरहेको छ र यिनलाई कसरी समय-समयमा चलाउन सकिन्छ, 'र'लाई बाहेक अरु कसलाई थाहा होला र ? समय कालान्तरमा नेपाली नागरिक भइसकेका र कतिपयले नेपाली नागरिकता लिन बाँकी रहेका अधिकांश 'फ्रस्टेड' यो समुदायलाई चलाउन र भड्काउन कुनै गाह्रो छैन ।

यही परिप्रेक्ष्यमा मोहिन खाँको हत्या भएको छ र यो हत्या साधारण हत्या मात्रमा सीमित हुन सकेको छैन । यस हत्याले मध्य पश्चिमका अधिकांश तराई जिल्लालाई प्रभावित तुल्याएको छ । यो हत्या सर्सर्ती हेर्दा एक समय माओवादी विरोधी चिनिएका मोहिनलाई 'ठेगान' लगाउने माओवादी नै हुनसक्ने सम्भावना देखिन्छ । यसले माओवादीप्रतिको वितृष्णालाई झनै चर्काउने कुरालाई नकार्न सकिन्न । पहिले लहानदेखि वीरगञ्जसम्म माओवादीको तराई पकडलाई ध्वस्त बनाइसकेपछि वीरगञ्जदेखि बुटवल खण्डको माओवादी पकडलाई सखाप पार्नु अमेरिकी-भारतीय चासोलाई कम आँक्नु हुने थिएन । मोहिन खानको हत्याले माओवादीलाई अर्को झड्का लागेको छ । माओवादीले अब यो खण्डमा रहेको आफ्नो पकडलाई विस्तारै गुमाउने छ । र, यो अनुमान लगाइरहनु पर्दैन कि अर्को प्रहार चाहिँ बुटवलदेखि नेपालगञ्जसम्मको माओवादी पकडलाई सखाप पार्नु नै तिनको उद्देश्य रहनेछ । त्यसै पनि मधेशी जनअधिकार फोरमको माघे क्रान्तिताका नै नेपालगञ्जमा सीडी प्रकरण भइसकेको छ । नेपालगञ्ज यस्तो ठाउँको रुपमा विकसित भइसकेको छ, जहाँ जतिबेला पनि धार्मिक हिंसा भड्किन सक्छ । नेपालगञ्ज पड्किन लागेको बम बनेको छ र यसलाई आगो झोस्न अनेक धार्मिक संस्थाहरु त्यसै पनि तयार छन् ।

अरु पार्टीहरुलाई लाग्ला, माओवादी सखाप पार्ने यो षडयन्त्र माओवादीलाई साइजमा ल्याउने कुराकै एउटा प्रकरण हो । उनीहरुलाई यो पनि लाग्ला, यस घटनाले उनीहरुलाई केही असर पार्ने छैन । तर अरु पार्टीलाई साइजमा ल्याउन सक्ने शक्तिले भोलि तिनलाई पनि पङ्गु बनाउन सक्छन् ।

यी सबै घटनाक्रमको विश्लेषण गर्दा के भन्न सकिन्छ भने नेपाली जनताले आफैँले निर्णय गर्न सक्ने ठाउँ निकै कम छ । त्यसैले गिरिजाबाबु कहिलेकाहीँ भन्छन्, देशको सार्वभौमिकतामा आँच आउन सक्छ । अहिले गिरिजाबाबुलाई प्रधानमन्त्रीको कुर्सी तात्तातो कन्ती बन्न पुगेको छ । यस्तो बेलामा आफ्नो कार्यक्षमता माथिको कम विश्वास र विदेशी शक्तिमाथिको भरोसा ज्यादा हुनुको अर्थ हुनसक्छ, नेपालको अस्तित्व नै नरहनु । तर के हाम्रा नेताहरुले यी कुरालाई ध्यान दिएका छन् त ?

 
Click Here To Read Previously Posted Article    Click Here To Read Next Article          
 
More on Updates
Related Tags:
संविधानसभा माओवादी crisis अनुभव awards पेट्रोल सेलेब्रिटी streets हल्ला hi-life festival मोबाईल समलिङगी events celebrity
Browse Tags in Other Group
 
 
Tags in MUSIC
विवाद गायिका गायक कन्सर्ट हल्ला ट्रयाक बाहिर उपलब्धि लुकेका कुरा रिलिज परिस्थिति अवार्ड कीर्तिमान बजारमा क्या बात ! रुचि पेज थ्री प्रेम र विवाह समुद्रपार विचार नेपाली तारा गीतकार सङ्गीतकार तातोपीरो भिडन्त
Browse all Tags in Group
Tag groups: cinema, city sightings, city updates, fashion & grooming, health, misc, music, relationship, technology, television, weird & interesting, work and office,
 
 
Your Name: City Country
Your Email:
Rate this Article: 
Comments:
Security Code: