Home» Cinema »Feature

डोरोटा सिस्कोभाको नेपाल अनुभव
 अच्युत कोइराला


पुसको यो चिसोमा आँखा नै सेकिने गरी मेरो घुम्ने मेचमा दुइ सुन्दर विदेशी बाला इन्टरनेटमा समाचार हेरिरहेका थिए । म अल्मलिएँ, गलत कोठा त थिएन ! अकस्मात अधिकारपूर्वक मेरै कोठामा म छिर्नु स्वाभाविक थियो । त्यसैले मेरो मेचमा बसेर, मेरै कम्प्युटरको कीबोर्ड थिचिरहेका ती बालाहरुलाई पनि अप्ठेरो महसूस हुनु अस्वभाविक थिएन । शुरुमा नेपाली केटीहरु नै होलान् भनेर म हच्किएँ- अर्काको मेचको दुरुपयोग गरिरहेकोमा मलाई थोरै 'जलन' पनि भयो । पछि थाहा पाएँ, यी चेक गणतन्त्रबाट गणतन्त्र हुन लागेको नेपाल हेर्न आइपुगेका मोडलहरु रहेछन् !

"...भनेपछि तपाइँहरु चेक गणतन्त्रबाट हान्निएर यहाँ मोडलिङ गर्न आउनु भएको !" मैले तिनलाई अंग्रेजीमा प्रश्न गरेँ । दुवै सुन्दरी एक छिन अकस्मात आएको प्रश्नले रन्थनिएर मतिर हेरे । दुइमध्ये डोरोटाले नै मलाई जवाफ फर्काइन्- "होइन, घुम्न आएकाले समयको सदुपयोग गरेको मात्र हो । फेरि मेरो लागि यो अप्ठेरो र नयाँ अनुभव पनि त होइन !"

यसपछि मैले डोरोटा सिस्कोभालाई नै छानेँ गफि्फने मेलोका लागि ।

उनका बुवाआमा नै थिएटर कलाकार ! ६ वर्षको उमेरदेखि नै थिएटरसँगको परिचय ! त्यसैले उनी यता तानिनु स्वाभाविक थियो । तर व्यक्तिगत रुपमा उनी यसलाई उति रुचाउन्न थिइन् । बरु उनको रुचिको विषय थियो, अल्टरनेट म्युजिक ! "मलाई सङ्गीत यति मन पथ्र्यो कि पाँच वर्षो उमेरमा त म पियानो बजाउन सिपालु भइसकेकी थिएँ", यत्तिकैमा चूरोट सल्काइन्- "लिऊँ त !" "मसँग बतियाउनका लागि चूरोट घूस चाहिन्न", मैले उनसँग ठट्टा गर्न चाहेँ, तर अंग्रेजीमा कुरो अलि पुगेन होला, त्यसैले उनी हाँसिनन् ।

१४ वर्षको उमेरमा यूरोपका तरुनीहरु त्यसै पनि मस्त देखिइन्छन् । उनी त झन् कलाकारिताले भरपूर घरमा जन्मिएकी थिइन् । उनले जानेदेखि नै घरमा, थिएटरमा, सुटिङ स्पटमा उनले अभिनय कला सिकेकै थिइन् । त्यसैले यौवनका चिहृनहरु थपिँदै जाँदा उनकै पिताजीले उनलाई चलचित्र खेल्ने अफर गरेका थिए । 'अर्बिस पिक्टस' (पिक्चर्स अफ द वर्ल्ड) उनले जानेर खेलेको पहिलो चलचित्र थियो । यसपछि मात्र उनलाई सिनेमा रस बस्यो ।

उनी जन्मिदा चेकोस्लोभाकियामा जन्मिएकी थिइन्, २५ वर्षअघि । १९९३ देखि उनी चेक गणतन्त्रकी नागरिक रहिन् । "देश टुक्रिए पनि मन टुक्रिँदो रहेनछ", छेउकी सुन्दर बाला एकाएक दार्शनिक बन्छिन्- "आज बिहान मात्र युरोपेली संघमा हाम्रोलगायत अन्य देशहरु सदस्यता पाएपछि म फुरुङ्ग छु, मेरो अनुहारमा त्यो देख्न सक्नु हुन्छ !" थाहा पाउँदैछु, अनुहार दिप्त छ, सप्पै थोक मिलेका यी सुन्दरीका दाँत चाहिँ नमिलिरहेको पाउँछु घरिघरि- हरिया देखिएकाले ! युरोपेली संघको सदस्यता पाएपछि अब यूरोपभरि हिँड्नडुल्न उनलाई पासपोर्ट बोकिरहनु परेन, झन्झट बेहोर्नु परेन । यही खुशी उनको अनुहारमा देखिएको थियो ।

उनी त कलाकार, केही समयअघि मात्र उनको 'मुसिम सि पोमाट' अस्कर अवार्डका नामाङ्कित भएको थियो । यस्तो अवस्थामा सानो जनसंख्या र सानै आकारको गणतन्त्रको कलाकार भएर कुँजिनु उनलाई मन छैन । संसारलाई घर ठान्छिन्, र त उनी नेपाललाई पनि उत्तिकै चाहन्छिन् ।

"यो समेत दुइ पटक भयो", नेपाल भ्रमणको गन्ती सुनाउँछिन्, चूरोटको ठूटो निभाउँदै- "पहिलो पटक आउँदा नेपालका केही प्रख्यात ठाउँ घुमेँ र प्रभावित भएँ । फेवा तालको किनारमा बसेर अघिल्लो पटक मलाई के लागेको थियो भने म 'अन्नपूर्ण रेञ्ज' चाहिँ पैदलयात्रा गर्छु, त्यही मोहले मलाई फेरि तान्यो ।" उनी आएको चार महिना बितिसकेछ । अब फर्कने बेला भयो । छेउबाटै फूर्तिका साथ आफूजस्तै 'स्लीम' ल्यापटम झिक्छिन् र मतिर तेर्स्याउँछिन्- "मैले खेलेको नयाँ सिनेमा !" ल्यापटपले सिनेमाको प्रोमो देखाइरहेको छ, जसमा उनी नग्न भएको र 'सेक्स सिन' दिएकोसमेत देखाइरहेको छ ।

"मलाई सिनेमामा सबैभन्दा मन नपर्ने चिज नै सेक्स सिन हो । मलाई कता कता अप्ठेरो हुन्छ, असहज लाग्छ । तर पेशा हो, निर्देशकले भनेपछि दृश्य दिनै पर्‍यो", फेरि उही हरिया दाँत देखाउँदै थप्छिन्- "म यूरोपेली त हुँ तर सोचाई चाहिँ नेपालीको जस्तो छ । त्यही भएर नै यो ठाउँ मलाई यति धेरै मन परेको हो कि !" मैले उनलाई केही भन्न आँ गरेँ तर भन्न मन लागेन । भन्ने मन त थियो- शायद अघिल्लो जन्ममा तिमी यतै गाउँघर कन्दराकी छोरी थियौ । विकटताबाट वाक्क भएर तिमी अन्तै जन्मिने इच्छा गरेकी थ्यौ क्यार ! तर घुमिफिरी यहीँ आइपुग्यौ ।

त्यसैले उनले यस पटकको भ्रमणमा आफ्नी बहिनीलाई पनि लिएर आइन् । छेउकी अर्की सुन्दरबालातिर हातले सोझ्याउँदै चिनाइन्- 'मिट टेरेजा, माइ सिस्टर ।' उनकी बहिनी झनै तगडा रहिछन्- डकुमेन्ट्री मेकर !

"यस पटक म पोखराभन्दा अलि माथिको गाउँ गएँ", नेपाल वर्णन गर्न थालिन्, यी यूरोपेली सुन्दरी- "जहाँ घाँस दाउरा गर्न टाढाको जङ्गल जानु पर्दथ्यो, गाई भैँसी चराउनु पर्दथ्यो । घाँस काट्ने, घर लिप्ने र अनेक काम गर्नु पर्दथ्यो । मैले मेरै उमेरकी एउटी महिललाई साथी बनाएँ र उसँगै म घाँस काट्न गएँ, गोबरले लिपेँ र उसले झैँ खाना बनाएँ ।" एउटा लामो सास फेरिन् उनले, शायद त्यस बेला पाएको सास्ती उनको दिमाग वरपर घुमिरहेको थियो । थपिन् पनि- "यदि म नेपालमा जन्मिएकी भए म उनीभन्दा फरक हुने थिइनँ । मेरा बाबाले १६ वर्ष नपुग्दै, स्कूल पढ्दापढ्दै बिहे गरिदिन्थे र १७ वर्षको उमेरमा तीन सन्तानकी आमा बनिसक्ने थिएँ ।"

उनी त डकुमेन्ट्रीका लागि अनुभव गर्न त्यहाँ पुगेकी थिइन्, तर तिनीहरुसँगको लगाव छुटेन । "मैले उनीसँग मित लाएँ", मितको नाम भन्नु हुँदैन झैँ उनले नाम बताइनन् । बरु उनको नाम उच्चारण गर्न सजिलो होस् भनेर मितिनीले नयाँ नाम दिइन्- फूलमाया । यसपछि उनी फेरि हाँसिन् ।

त्यसो त यूरोपमा पनि जीवन उति सजिलो कहाँ छ र ! उनले १९ वर्ष नपुग्दै एउटा लक्का जवान (नाम खुलाइनन्) लाई बिहे गरेकी थिइन् । "उ पनि मजस्तै सङ्गीत गर्ने थियो, हाम्रो मन मिल्थ्यो । त्यसैले एउटै पेशा, एउटै हित्तचित्त भनेर बिहे गरेकी थिएँ", यसपछि उनको अनुहारमा हाँसो बिलायो- "हामीलाई सन्तान अहिले चाहिएको थिएन, किनभने जीवनमा धेरै थोक गर्न बाँकी नै थियो । गएको वर्ष नै हो हाम्रो ब्रेक अप भयो । हामी छुट्टियौँ । सन्तान नभएकाले बरु सम्बन्ध सिध्याउन सजिलो भयो, नत्र झन् झ्याउ हुन्थ्यो ।" उनले यो कुरा चाहिँ चाँच्चाँडो भनिन्, ताकि चूरोटको सर्को सिध्याउञ्जेलसम्म उनको यो बात पनि सिध्धियोस् ।

मलाई अझ गहिरो गरी उनीहरुको प्रेम, सेक्स र अन्य कुराहरु सोधुँ झैँ लागेको थियो तर आँखाभित्रका रेशा रातो हुँदै आएका थिए । मैले अझ बढी केही सोधेँ भने त्यहाँबाट आँशु निस्कन बेर लाग्ने थिएन । मलाई नारीको आँशु हेर्न उचित लाग्दैन । मैले त्यसबारेमा कोट्याइनँ । तर यति भनेँ- "तिमीहरुकोमा विवाहित जीवन कति चाँडो सकिन्छ, हगि ?" "कानूनी रुपमा त्यहाँ छुट्टिन त सजिलो छ, तर यहाँ मनभित्रबाट छुटाउन कम्ता गाह्रो हुँदैन", उसको वैश्विक सत्य एक साथ आउँदा मेरो मुखबाट वाक्य फुट्यो- "क्या बात !" उनले सोचिहोलिन्- पक्कै कुनै संवेदनाको स्वर होला !

एक झमटको बसाइमा यूरोपकी एउटी बालाको जीवन कथा सुनिसकेको थिएँ । मैले उसलाई अझ भावुकतातिर डोर्‍याउन चाहिनँ । उसलाई भविष्यको योजना सोधेँ, उसँग निकै लामो लिस्ट थियो । जसमध्ये अब उनी गोवा जानेछिन्, जहाँ उनको मित दाइको बिहेमा भाग लिने छिन् । त्यसपछि भर्खरै प्रोमो देखाइएको सिनेमाको रिलिजका लागि प्रचारप्रसारमा लाग्ने छिन् । त्यसलगत्तै उनले बनाएको नयाँ म्युजिक एल्बम बजारमा ल्याउने छिन् र त्यसपछि एल्बम प्रचारको यूरोप टूरमा निस्कने छिन् । त्यो छोटो टूर सकिने बित्तिकै उनी अप्रिलमा फेरि उनको नेपाल आइपुग्ने योजना छ । "नेपाल घुम्न अझै धेरै बाँकी छ", उनको अनुहार यतिबेला दिप्त देखियो- "पहाड र हिमाल मेरा प्रिय सङ्गी हुन् । त्यसैले यो देश मलाई मन पर्छ । अछुतो विषय, अछुता परम्परा र संस्कृति हेर्न लायक् चिजबिजको लामो सूचि बन्छ । मानौँ समय रोकिएको छ यहाँ । रोकिएको समयभित्र म रुमल्लिन चाहन्छु ।"

एउटी विदेशी कन्या मलाई मेरै देशको महत्वबारे बतियाउँदै थिई ! जाऊ डोरोटा, घुम ! आँखाभरि नेपालको सपना र मनभरि नेपालीको व्यवहार बोकेर जाऊ !


 
Click Here To Read Previously Posted Article    Click Here To Read Next Article          
 
More on Feature
Related Tags:
अभिनेत्री विचार ट्रयाक बाहिर गायिका अभिनेत्री अभिनेता सेलेब्रिटी समारोह रिलिज सेक्स प्रविधि सुटिङ हल्ला पेज थ्री
Browse Tags in Other Group
 
 
Tags in Relationship
sex dating divorce cheating kissing marriage honeymoon friends tips gifts breakup infidelity parties know women attracting girls know men attracting guys flirting love personal valentine's day ex-love occassion fun read memories Family
Browse all Tags in Group
Tag groups: cinema, city sightings, city updates, fashion & grooming, health, misc, music, relationship, technology, television, weird & interesting,