Home» Sports »Football

पुलिसलाई उपाधि र २० लाख, हरि खड्कालाई कार

-दीपेन्द्र लामा

नेपालका उत्कृष्ट फुटबलर हरि खड्काका लागि हिजोको दिन एउटा स्मरणीय दिनका रुपमा आयो । उनको खेलजीवनको उत्कृष्टतालाई मूल्यांकन गर्दै अखिल नेपाल फूटबल संघले उनलाई महंगो टोयोटा यारिस् कार पुरस्कारस्वरुप प्रदान गरेको छ । सो पुरस्कार हिजो आयोजित शहीद स्मारक सानमिगल लिग फूटबल प्रतियोगितामा प्रदान गरिएको हो । उत्कृष्ट खेलाडीहरुका लागि गएको वर्षदेखि वैद्य अर्गनाइजेशनको प्रायोजनमा संघले यस्तो पुरस्कार दिन शुरु गरेको हो । गएको वर्ष उपेन्द्रमान सिंहले यो पुरस्कार हात पारेका थिए ।

यस वर्षको शहीद स्मारक सानमिगेल लिग 'ए' डिभिजन फुटबल प्रतियोगिताको उपाधि महेन्द्र पुलिस क्लबले जितेको छ । उसले बिहीबार दशरथ रंगशालामा सम्पन्न अन्तिम खेलमा त्रिभुवन आर्मी क्लबलाई २-० ले हराई उपाधि उचालेको हो । करीब २२ हजार दर्शकको उपस्थिति रहेको र नेपाल टेलिभिजनबाट प्रत्यक्ष प्रसारण गरिएको उक्त खेलमा पुलिसका लागि रमेश बुढाथोकी र जुमान राईले गोल गरेका थिए ।

विजेता पुलिस टिमले ट्रफीसँगै २० लाख नगद हासिल गरेको छ भने उपविजेता आर्मीले १० लाख जितेको छ । गत कात्तिकदेखि सुरु भएको उक्त प्रतियोगितामा नबिल थ्रीस्टार, कार्ल्सवर्ग मनाङ मर्स्याङ्दी र सशस्त्र प्रहरीले क्रमशः तेस्रो, चौथो र पाँचौं भई पाँच लाख, तीन लाख र दुइ लाख नगद प्राप्त गरे । त्यस्तै छैठौं मच्छिन्द्र, सातौं फ्रेण्स् र आठौं न्युरोड टिमलाई क्रमशः एक लाख, ६० हजार र ४० हजार प्रदान गरियो । मच्छिन्द्रले फेयर प्ले ट्रफीसहित थप ५० हजार पुरस्कार हात पार्‍यो ।

प्रतियोगितामा उत्कृष्ट प्रदर्शन र राष्ट्रिय टिममा विशेष योगदान दिएवापत पुलिसका हरि खड्काले साढे २७ लाख पर्ने टोयोटा यारिस् कार प्राप्त गरेका छन् । पुलिसकै प्रशिक्षक विराट श्रेष्ठले उत्कृष्ट प्रशिक्षक भएवापत् यामाहा जी फाइभ बाइक पाएका छन् । त्यस्तै सर्वाधिक गोलकर्ता अनिल गुरुङ (मनाङ), उत्कृष्ट फरवार्ड विकर्ण श्रेष्ठ (आर्मी), उत्कृष्ट मिडफिल्डर राजु तामाङ (आर्मी), उत्कृष्ट डिफेन्स (थ्रीस्टार) र उत्कृष्ट गोलकिपर सुरेन्द्र श्रेष्ठ (एनआरटी)ले पनि उक्त बाइक जितेका छन् ।

अखिल नेपाल फुटबल संघद्वारा आयोजित प्रतियोगिताको अन्तिम दुइ स्थानमा रहेपछि सरस्वती युवा क्लब र ब्रिगेड ब्वाइज क्लबले 'ए' डिभिजन क्लबको हैसियत गुमाउँदै 'बी' डिभिजनमा ओर्लिएका छन् । प्रतियोगिता अवधिभर टिकटबाट उठेको रकम सहभागी १४ क्लबलाई दामासाही रूपमा प्रदान गरिनेछ ।

विजेता टिम पुलिसले आगामी मे १७ देखि पाकिस्तानको लाहोरमा आयोजना हुने एएफसी प्रेजिडेन्टस् कप प्रतियोगितामा नेपालको प्रतिनिधित्व गर्नेछ । उक्त प्रतियोगिताको तयारी स्वरुप पुलिसले एसियाली फुटबल महासंघबाट कम्तीमा १० लाख नगद छुट्टै पाउनेछ । प्रतियोगितामा नेपालबाहेक किर्गिस्तान, ताजिकिस्तान, क्याम्बोडिया, ताइवान, पाकिस्तान, श्रीलंका र भुटान गरी आठ राष्ट्रका लिग विजेता टिमहरूको सहभागिता रहनेछ ।

 

Related Links:
टोयोटा यारिस् कार

 
Click Here To Read Previously Posted Article    Click Here To Read Next Article          
 
More on Football
Browse Tags in Other Group
 
 
Tags in Health
weight body-care seasonal-illness diet sleep skin stress food body-ache Psychology fatigue nutrition mental -health oral-health headache
Browse all Tags in Group
Tag groups: cinema, city sightings, city updates, fashion & grooming, health, misc, music, relationship, technology, television, weird & interesting, work and office,
 
 
Your Name: City Country