Home» Music »Feature

रियालमा र्‍याल !


केही समयअघि कतारबाट नेपाल फर्किएका गायक प्रकाश पौडेल अहिले साइको गीति एल्बम लिएर बजारमा आएका छन् । अहिले उनको हबिबी... गीत चर्चाको वृत्तमा छ । राम्रो नाम र दाम कमाइरहेका प्रकाश अचानक कतारमा काम गर्न थालेको खबर प्रकाशित भएपछि उनलाई कतारी रियालमा र्‍याल चुहाएको आरोप पनि कतिले लगाए । तर त्यहाँ काम गर्नु र्‍याल चुहाएर होइन कि त्यसबेलाको समयको मागका कारण हो भन्न उनी चुक्दैनन् ।

नेपाली सङ्गीतको उदयसँगै खासगरी रेडियो नेपालको स्थापना र गीतहरु रेकर्ड गर्ने चलनसँगै विभिन्न किसिमका साङ्गीतिक प्रयोगहरु हुँदै आएका छन् । त्यसैले त नारायण गोपाल, कुमार बस्नेत तथा ओमविक्रम विष्टका गायनमा २०२० को अन्तिम दशकमा पपगायनको प्रारम्भिक उदय भएको थियो । त्यसपछि प्रजातन्त्र पुनर्स्थापनासँगै खुला वातावरणमा पप गायनले निकै ठूलो फड्को मार्‍यो । २०५० को दशकको मध्यदेखि गायनमा अर्को मोड देखापर्‍यो, जसलाई हिपहप र र्‍याप भनेर पनि चिनिन्छ ।

यस्तो अवस्थामा प्रकाश पौडेलले गायनको नितान्त नौलो स्वरुप बोकेर थ्री मच एल्बम बजारमा ल्याएका थिए । यो थ्री मचमा उनले रोएर गाएका थिए- नाइँ मलाई त्यै केटी चाहिन्छ । यो गीत बजारमा के आएको थियो, एउटा गुमनाम प्रकाश पौडेल रातारात हिट गायकका रुपमा परिचित भए । तर, सँगै उनलाई सबैभन्दा विवादास्पद गायक भनेर पनि चिनिन्छ । उनको यो गीतका बारेमा साहित्यकारदेखि लिएर मन्त्रीसम्मले चर्चा गरे । गीतसङ्गीतलाई बिगारेको आरोप पनि उनमाथि लगाइयो ।

यसरी बनेको परिचयलाई निरन्तरता दिन नेपाली गीतका अनेक पक्षमाथि उनले प्रयोग गरिरहेका छन् । हालै उनले साइको नामक एल्बम बजारमा ल्याएका छन् । उनको नयाँ एल्बम र पुराना सफलताका बारेमा आज चर्चा गरौँ ।

तपाइँलाई प्रायः रुञ्चे गायक भन्छन् नि ?
शायद पहिलो हिट गीत नै रोएर गाएको हुनाले होला । तर मैले त्यो एल्बममा अन्य किसिमका गीत पनि गाएको थिएँ ।

तपाइँले त नाइँ मलाई त्यै केटी चाहिन्छ गाएर नेपाली सङ्गीतको मोड नै बिगारिदिएको आरोप लगाइन्छ नि ?
धेरैले मलाई त्यो गीत गाउँदा गाली गर्नु भएको छ । एक पटक त प्रख्यात लेखक खगेन्द्र सङ्ग्रौलाले कान्तिपुरमा मेरो गीत र अहिलेको नेपालको राजनीति दुवै मिसाएर गाली गर्नु भएको थियो । त्यसबाहेक अन्य धेरै व्यक्तिले प्रत्यक्ष/अप्रत्यक्ष रुपमा गाली गरिरहनु भएको छ ।

तपाइँलाई चाहिँ यो गीत यसरी नै बनाउँछु भनेर कसरी सोच आयो ?
एउटा जमैकन गीत सुनेको थिएँ । मलाई सधैँ लागिरहन्थ्यो कि केही नयाँ काम गर्नुपर्छ । त्यही अनुसार नेपालमा अहिलेसम्म कसैले नगरेको गीत गाउने विचार अनुसार त्यही गीतको शैली चोरेको हुँ ।

भनेपछि यो जमैकन गीतको नेपालीमा नक्कल गर्नु भएको ?
त्यसो भन्दा पनि त्यो गीतबाट प्रभावित भएको चाहिँ भन्न मिल्छ ।

यसरी गीतलाई हुबहु नक्कल गर्नुलाई तपाइँ राम्रो मान्नुहुन्छ ?
हुबहु नक्कल त नराम्रो काम भयो तर त्यसबाट प्रेरणा लिएर नयाँ कुरा पस्किनु चाहिँ ज्यादै असल काम हो ।

तपाइँलाई त यो गीतले निकै फाइदा दियो क्यारे ! कति कमाउनु भयो ?
जति कमाएँ, सबै सङ्गीतमा नै लगानी गरेँ ।

गायकगायिकाहरुले त गाएर पैसा कमाउँदैनन् भन्छन् नि ?
जो ज्यादै पपुलर हुन्छ, त्यसका लागि त्यो वर्ष कमाई पनि राम्रो हुन्छ । उसले एल्बमबाट एक मुष्ठ रकम पाउँछ । उसलाई विभिन्न ठाउँबाट कर्न्र्सटको निम्तो आउँछ । तर यो डेगिलो र दीर्घकालीन चाहिँ हुँदैन । एल्बम हिट भएको वर्ष मात्र यसले काम गर्छ । त्यसपछिका वर्ष उत्तिकै हिट हुन सकेन भने खान पनि समस्यामा पर्न सकिन्छ ।

सानोमा तपाइँलाई कहिल्यै गाउँछु वा गायक हुन्छु जस्तो लागेको थियो ?
अँहँ, पटक्कै सोचेको थिइनँ । मेरो लक्ष्य चाहिँ डाक्टर हुने थियो । त्यही भएर मैले एसएलसी पास गरेपछि बायोलजी पढ्ने विचारले क्याम्पसमा प्रवेश परीक्षा दिएको थिएँ । तर म फिजिक्समा छानिएँ । त्यसपछि मैले डाक्टर हुने सपना नै त्यागिदिएँ ।

सानोमा कहिले तपाइँलाई सङ्गीतप्रति मोह कसरी मोह जाग्यो ?
सानोमा रेडियो सुन्थेँ । पछि क्यासेटको जमानामा हिन्दी र अंग्रेजी गीतहरु डब गरेर सुन्ने बानी बस्यो । साथीहरुको संगतले अंग्रेजी गीतमा लत लाग्यो । मैले स्कूलको खाजा खर्च जोगाई जोगाई गीतहरु डबिङ गर्थेँ । त्यतिबेला दुइ/दुइ रुपियाँ जम्मा गरेर क्यासेट डब गर्थेँ । शायद त्यो रुचि नै पछि गीत गाउने आधार बन्यो ।

पहिलो पटक कहिले लाग्यो कि अब म सङ्गीत सिर्जना गर्छु / यही नै मेरो लक्ष्य हुनेछ भनेर ?
फरक काम गरौँ भन्ने लागेर एक पटक गीत रेकर्ड गराउने इच्छा जाग्यो । त्यही फरक सोच धरानमा रेकर्ड गराएँ । धेरै साथीभाइले हौसला दिए । पछि एल्बम पनि निस्कियो र ज्यादै हिट भएपछि लाग्यो कि वास्तवमा मैले खोजेको कुरा चाहिँ सङ्गीत रहेछ !

तपाइँ त साइन्स पढ्छु भन्नु हुन्थ्यो, पछि किन कमर्स पढ्नु भयो ?
माथि नै भनेँ कि बायोलजी पढ्नुपर्नेमा फिजिक्सतिर तानिदियो । त्यसपछि साइन्स पढ्न दिक्क लागेर कमर्स पढेँ । कमर्समै डिप्लोमा सकेँ ।

आईकम पढिसकेपछि तपाइँ बीपी कोइराला अस्पताल धरानमा जागीरे हुनुभयो, यसले तपाइँको संगीत सिर्जनालाई असर गरेन ?
अँ जागीरे त भएँ, यसले पैसा लगानी गर्न उति गाह्रो भएन ।

पहिलो एल्बम थ्री मच निस्किएपछि यसको गीत मान्छेले ज्यादै रुचाए, त्यसबेला त निकै होहल्ला भएको थियो । तर दोस्रो एल्बम भाइरस निकाल्दा चाहिँ उत्ति चर्चा भएन नि ?
शायद मेरो छनोट ठीक भएन कि ! नत्र त त्यो एल्बममा पनि मैले प्रयोग नै गरेको थिएँ ।

त्यसमा तपाइँले प्रयोग गर्नु भएको थियो- खासखुस गर्ने गीत । अहिले सम्झिँदा त्यो प्रयोग सफल भएन होइन ?

लोकप्रियताको हिसाबले त्यो सफल भएन । तर मैले नयाँ प्रयोग गर्न डराइनँ । त्यो चाहिँ भन्न सकिन्छ ।

त्यसपछि तपाइँले आफ्नो तेस्रो एल्बम रेस थ्री निकाल्नु भयो । त्यसमा सुकेको जीउ...को गीतको चर्चा निकै भयो । तर एल्बम त्यति बिक्री भएन भन्छन् नि ?
राम्रो बिक्री भएको हो ।

अहिले तपाइँको नयाँ एल्बम साइको बजारमा आएको छ, यो एल्बममा तपाइँले के भन्न खोज्नु भएको छ ? किन नाम साइको राख्नु भएको ?
अलि भिन्दै किसिमको प्रयोग यसमा पनि भएकाले नाम साइको राखेको हो । यसमा मैले र्‍याप दोहोरी र 'किस' सम्बन्धी गीत दुवै प्रयोगात्मक गीत राखेको छु । हबिबि... गीत त अहिले नै हिट भइसकेको छ । मलाई लाग्छ, यसले दर्शकको ध्यान पुनः मतिर आकर्षित गर्नेछ ।

यत्तिका एल्बम निकालिसकेको व्यक्ति, यति धेरै नाम कमाइसक्नु भएको छ । पछि खबर सुनियो कि तपाइँ कतारमा जागीर खान जानु भयो अरे, खास के हो ?
खासमा एउटा साङ्गीतिक कार्यक्रमको निम्तो मान्न कतार गएको थिएँ । त्यहाँ मेरा धेरै साथीहरु काम गर्छन् । उनीहरुले एउटा राम्रो प्रस्ताव राखे जागीरको । मैले पनि फूर्सदको समय सदुपयोग गरेर त्यहाँ काम गरेँ ।

अब फेरि जाने योजना छ कि ?
अब अहिले तुरुन्तै फर्किने त योजना छैन तर देशको स्थिति यस्तै रहने हो भने जान पनि सक्छु ।

तपाइँको भविष्यको योजना के छ ?
मैले भविष्यमा केही गरेँ भने सङ्गीत उद्योगमै केही गर्छु ।

 
Click Here To Read Previously Posted Article    Click Here To Read Next Article          
 
More on Feature
Related Tags:
गायक रिलिज लुकेका कुरा प्रेम र विवाह क्या बात ! गायिका कीर्तिमान तातोपीरो सङ्गीतकार कन्सर्ट रुचि उपलब्धि नेपाली तारा गीतकार भिडन्त विचार हल्ला विवाद बजारमा पेज थ्री
Browse Tags in Other Group
 
 
Tags in Technology
gadgets mobile digital camera phone software people speak laptop communication Filming
Browse all Tags in Group
Tag groups: cinema, city sightings, city updates, fashion & grooming, health, misc, music, relationship, technology, television, weird & interesting, work and office,