Home» Music »Feature

बोकु बोकेर बोकेदाह्री


 

अघिल्लो एल्बम 'बोकेदाह्री' श्रीकृष्ण लुइँटेललाई यति फाप्यो कि पछिल्लो एल्बमको पनि नाम त्यस्तै जुराएका छन् । एल्बमको नाम के हो थाहा छ ? 'बोकु' ! किन त ? गायक लुइँटेलसँग यसको प्रशस्त जवाफ छ ।

"पहिले बोकेदाह्री एल्बम निस्किएपछि मलाई बोकेदाह्री भन्ने नाम राखे श्रोता र दर्शकहरुले", चिरपरिचित सपक्कसँग रबरले बाँधेको बोकेदाह्री मुसार्दै उनले थपे- "पछि मायाले त्यो नाम परिवर्तन भएर 'बोकु'मा आयो । सानाले बोकु अंकल, ठूलाले बोकु भाइ, अलि छिप्पिएकाले बोकु दाइ भन्न थालेपछि मेरो नाम नै बोकु भयो । आम जनताले मलाई राखिदिएको त्यही नाम मैले एल्बममा जुराएको हुँ ।"

त्यसो त उनको लोकप्रियता काठमाडौँ पारि कम्ता छैन । उनलाई गएको वर्ष श्रोताहरुको निम्तोबाट फूर्सद निकाल्न गाह्रो पर्ने गरेको थियो । उनको अघिल्लो एल्बम १ लाख ५० हजार बढी बिक्री भएको थियो । अघिल्लो एल्बमको सफलताले उनलाई यस पटक अझ बढी उत्साह थपेको छ ।

यस पटकको 'बोकु'लाई बेस्कन हिट गराउन उनले कसर ता छाडेका छैनन्, भन्छन्- "यो एल्बम हिट गराउन मैले गएको मंगलबार दक्षिणकालीमा कुखुराको भाले चढाएँ ।" त्यसो त उनी शाकाहारी भएकाले उनले त्यो भाले काट्न चाहेनन् र मन्दिर परिसरमा छाडेर काठमाडौँ छिरे । यसअघिको एल्बममा पनि उनले दक्षिणकालीमा पूजा गरेका थिए ।

दक्षिणकालीको यात्रापछि उनले काठमाडौँको भद्रकालीमा १० जना एफएमका सञ्चारकर्मीलाई भेला गराएर सामान्य पूजाआजापछि तिनलाई एल्बम विमोचन गर्न लगाए । त्यसपछि छेउकै अर्को मन्दिर महाङ्कालमा गएर ३० जना अशक्त र मगन्तेहरुलाई भेला पारेर भोजन गराए ।

उनलाई देवीदेउता भाकेर एल्बम हिट हुन्छ भन्ने विश्वास उत्ति छैन । सबैभन्दा बढी विश्वास उनी भगवानमा भन्दा पनि आफ्नो सिर्जनामा गर्छन् । त्यसैले यस पटकको एल्बमलाई बढी रुचिपूर्ण बनाउन कसर छाडेका छैनन्, थप्छन्- "पहिलेको एल्बममा बढी हास्य व्यङ्ग्य र थोरै सामाजिक सन्देशका कुराहरु थिए ।" यस पटकको एल्बममा चाहिँ बढी सामाजिक सन्देश र कम हास्य प्रयोग गरेका छन् ।

अघिल्लो एल्बमको सफलताको श्रेय यसका चोटिला म्युजिक भिडियो हुन् भन्ने कुरा उनले बिर्सिएका छैनन् । त्यसैले यस एल्बमका नौ गीतमध्ये आठ वटाका भिडियो पनि उनले तयार पारेका छन् । उनलाई यी भिडियोको बिक्री पनि गज्जबले हुने विश्वास छ ।

बीचमा उनी च्यानल नेपालमा 'आयो बोकेदाह्री' हास्य श्रृङ्खला बोकेर पनि आएका थिए । अहिले त्यो बन्द छ, किन त ? "एउटा दृश्यमा रुखबाट हाम्फाल्नु पर्दा मेरो गोडा नै भाँच्चियो । त्यसले गर्दा सुटिङ नियमित हुन नसकेर त्यो अड्कियो । अहिले त प्राथमिकता आफ्नै एल्बमलाई दिनु परेकाले त्यो श्रृङ्खला अड्किएको हो । पछि त्यो नियमित हुनेछ ।"

 
Click Here To Read Previously Posted Article    Click Here To Read Next Article          
 
More on Feature
Related Tags:
ट्रयाक बाहिर गायक रिलिज सङ्गीतकार समुद्रपार लुकेका कुरा क्या बात ! कीर्तिमान तातोपीरो अवार्ड नेपाली तारा उपलब्धि प्रेम र विवाह भिडन्त विचार पेज थ्री रुचि गायिका गीतकार कन्सर्ट
Browse Tags in Other Group
 
 
Tags in City Sightings
festival releases celebrity party events story wedding bandhs & protests bizarre traffic real picture hi-life city beauty pageant travel culture awards
Browse all Tags in Group
Tag groups: cinema, city sightings, city updates, fashion & grooming, health, misc, music, relationship, technology, television, weird & interesting,