Home» Music »Feature

सरोज प्रतिस्पर्धाबाट बाहिर



सफलता धेरैको भाग्यमा हुँदैन । तर पनि त्यसलाई सहजरुपमा लिने कम गायकमध्ये एक पर्छन्- सरोज दत्त । विगत १२ वर्षदेखि नेपाली पपगायनमा अविचलित रुपमा निरन्तर लागिरहेका गायक दत्तलाई पहिलो पटक चीसो पानीमा गीति एल्बमले चिनाएको थियो । उनको यो एल्बमको शीर्षक गीत चिसो पानीमा माया चिसो पानीमा...लाई उनी जुन ऊर्जाका साथ गाएका थिए, त्यो ऊर्जाले नै उनलाई अन्जान र संघर्षशील गायकबाट एकै पटकमा कर्मशील गायकका रुपमा स्थापित गरायो । तर पनि उनलाई नजिकबाट चिन्नेहरुले गुनासो गर्छन्, सरोजको क्षमता अनुसार उसको प्रतिभाको कहिल्यै कदर भएन । उनीभन्दा कम क्षमतावान् गायकहरु हेर्दाहेर्दै स्टार भए, तर उनी दिनदिनै सङ्गीतको रङ्गीन पर्दाबाट हराउन थालेको गुनासो नजिकका साथीभाइको छ ।

धेरैले तपाइँलाई क्षमतावान् गायक भन्छन्, तर पनि पछि पर्नु भयो भनेर गुनासो गर्छन्, के भन्नुहुन्छ ?
मलाई व्यक्तिगत रुपमा भेटेरै भन्ने साथीहरु पनि थुप्रै छन् । मलाई पनि कहिलेकाहीँ लाग्छ, मेरो जति क्षमता छ, त्यति हिट हुन सकिनँ । तर पनि म असन्तुष्ट चाहिँ छैन । शायद मैले गर्ने काम, मेरो र्समर्पण र इमान्दारिता कहीँ कतै कमी होला !

बच्चामा गायक हुन्छु भन्ने लागेको थियो ?
गायकै हुन्छु भनेर त बच्चामा कसले सोच्छ र !

तपाइँलाई घरमा कोही पाहुना आउँदा पनि गाएर सुना त भन्नुहुन्थ्यो रे नि ?
अँ, त्यो चाहिँ साँचो हो । घरमा समारोह वा भेला हुँदा आमाले मलाई पाहुनाको अघिल्तिर गाएर देखा भन्नुहुन्थ्यो, अनि म पनि के कम र ! गाउन शुरु गरिहाल्थेँ ।

गाउने सनक चाहिँ रेडक्रसले आयोजना गर्ने स्कूलस्तरीय कार्यक्रमको सफलताले गर्दा नै आएको भन्छन् नि ?
अँ स्कूलमा बेलाबेलामा विभिन्न कार्यक्रम हुन्थे । त्यसमा गाउने जिम्मा मेरो हातमा पथ्र्यो । गाउँथेँ र पुरस्कार पनि हात पारिहाल्थेँ । सत्यनारायण माध्यमिक विद्यालय विराटनगरको म राम्रै विद्यार्थी थिएँ ।

तपाइँ स्कूलताका कस्तो विद्यार्थी हुनुहुन्थ्यो ? पढ्न मन गर्नुहुन्थ्यो कि हुन्नथ्यो ?
म एउटा राम्रो, अनुशासित विद्यार्थी थिएँ ।

जब तपाइँ क्याम्पस पढ्न काठमाडौँ आउनु भयो, सोचाई सङ्गीतमै केही गर्छु भन्ने थियो कि पढाईमा मात्र ध्यान दिन्छु भन्ने थियो ?
सङ्गीतमा रुचि त थियो, तर यसैमा लाग्छुजस्तो चैँ लागेको थिएन । तर सङ्गीतले तानिहाल्यो ।

पछि तपाइँले सुनील बर्देवा र महेश्वर राजभण्डारीसित मिलेर साङ्गीतिक ब्याण्ड बनाउनु भयो, म्याटि्रक्स । कसरी जोडी मिल्यो ?
म त्यतिबेला मेरी फुपुको घरमा बसेर क्याम्पस पढिरहेको थिएँ । नजिकै सुनील र महेश्वर बस्थे । बेलाबेलामा हाम्रो भेट हुन्थ्यो र त्यहीँ ब्याण्ड बनाउने सोच शुरु भयो । हामीले शुरुताका अंग्रेजी गीत गाउँथ्यौँ । ती गीतले नै हाम्रो ध्यान खिँच्यो र पछि क्याम्पसका विभिन्न स्वागत कार्यक्रममा हामीलाई निम्तो आउन थालेपछि हामी लोकल्ली हिट भयौँ ।

कुन बेला लाग्यो, अब मैले गाउनु पर्छ, एल्बम निकाल्नु पर्छ भनेर ?
हामीले यसरी गाउँदै जाँदा सजनस्मृति पप प्रतिस्पर्धामा प्रथम भएर
पुरस्कार पनि जित्यौँ । यो पुरस्कार जितेपछि हामीले एल्बम निकालेका हौँ ।

तर एउटा एल्बम निकालिसकेपछि तपाइँको जोडी टुट्यो किन ?
सबै व्यस्त भयौँ । कोही अमेरिका, कोही काम गर्ने धूनमा अनि कसैको के मजबुरी ! यस्तो भएपछि हामीले अलग-अलग भएर काम गर्ने विचार गर्‍यौँ ।

एकल एल्बम निकाल्नु हुँदा हिट होइएला, नाम कमाइएला भन्ने सोच्नु भएको थियो ?
रुचि भएकाले आफ्नो सिर्जना त हुनुपर्छ भन्ने लागेको थियो । तर हिट होइएला, नाम कमाइएला भनेर सोचेका थिइनँ । तर पहिलो एकल एल्बमले नै मलाई थोरबहुतले चिन्न थाले ।

तर हिजोआज हरेक दिन नयाँ गायक जन्मिरहेका छन्, लोकप्रियता पनि तपाइँले चाहेजस्तो पाउनु भएको छैन । यस्तो अवस्थामा तपाइँलाई कहिल्यै नयाँ पुस्ताका गायकसँग असुरक्षित महसूस हुँदैन ?

हुँदैन, बरु खुशी लाग्छ । अहिले सोच्दा यस्तो लाग्छ कि कसरी यत्तिका १२ वर्षबितेछन् ! नयाँ गायकहरुको युवा जोश देख्दा मलाई पनि जोश आउँछ र म उत्तिकै जोशिएर गाइरहेको हुन्छु ।

नेपाली गायनको भविष्य कस्तो देख्नुहुन्छ ?
जबसम्म नेपाली भाषा रहन्छ, यसमा लाग्ने सङ्गीतकर्मीहरुको भविष्य उत्तिकै सुरक्षित हुन्छ । राम्रो भविष्य देख्छु म । किनभने हिजो मै अंग्रेजीमा गीत गाउँथेँ, तर आज म नेपालीमा गाउँछु । नेपालमा बस्नु हुन्छ र नेपाली हो भने तपाइँले नेपालीमा नगाई धरै छैन !

 
Click Here To Read Previously Posted Article    Click Here To Read Next Article          
 
More on Feature
Related Tags:
गायक रिलिज क्या बात ! प्रेम र विवाह लुकेका कुरा गायिका तातोपीरो रुचि उपलब्धि कीर्तिमान कन्सर्ट सङ्गीतकार गीतकार पेज थ्री नेपाली तारा विवाद विचार भिडन्त हल्ला बजारमा
Browse Tags in Other Group
 
 
Tags in Cinema
सेक्स अभिनेता अभिनेत्री सेलेब्रिटी रिलिज समारोह सुटिङ हल्ला पेज थ्री प्रविधि
Browse all Tags in Group
Tag groups: cinema, city sightings, city updates, fashion & grooming, health, misc, music, relationship, technology, television, weird & interesting, work and office,