Home» Cinema »Biography

राजनीति छाडेर सिनेमा

नेपाली कांग्रेसका शीर्षस्थ नेता कृष्णप्रसाद भट्टराई त कैयौं पल्ट काकू बाबुको घरमा बास बस्न पुग्थे । वनारसबाट नेपाल आउँदा सीधै विराटनगर जान्थे र देवकोटा चोकस्थित काकू बाबुको घरमै भट्टर्राईको भोजन हुन्थ्यो । सुत्न भने, कोइराला निवास नै पुग्नु उनको नियमितता जस्तै भइसकेको थियो । त्यसै क्रममा काकू बाबुका फुच्चे पुत्र उनीहरुसँग घुलमिल हुन थाले ।

काकू बाबुको घरमा धोती लाएर मोटरमार चुरोट सल्काउँदै ट्वाइलेटको ढोका ढकढकाउँदै गर्ने अर्का कांग्रेस नेता गिरिजाप्रसाद कोइरालासँग पनि फुच्चेको भेट भयो । एकदिन त उसले नेता कोइरालालाई ट्वाइलेट बाहिर ज्यादै कुराएर हैरान पनि पारिदियो ।

वि.सं. २०३५ सालमा नौ वर्षो फुच्चेले विराटनगरभरिका केटाकेटी जम्मा गरेर वी.पी. जिन्दावाद भन्ने दुस्साहस गर्‍यो । सोही वर्षबनारसमा निर्वासित जीवन बिताएर वी.पी. पहिलो पल्ट बिराटनगर आएका थिए । सहीद मैदानमा वी.पी.को भाषण सुनेपछि त्यही फुच्चेसँग कोइराला कांग्रेसका वर्तमान महामन्त्री सुशील कोइराला उसकै कोठामा सुत्न आउँथे ।

नातामा दाजु सुशील कोइरालासँग पहिलो पल्ट पैतीस सालमै काठमाडौं आएको फुच्चेलाई अझै सम्झना छ । सुशीलसँग साझा यातायात चढी सीधै काठमाडौं आएर वी.पी. बस्ने चाबहिलस्थित ज्योति कोइरालाको निवासस्थान पुगेको त्यो सानो केटोले फुपाजु दमननाथ ढुंगानासँगको भेटघाट अनि घुमघामको क्षणलाई अझै बिर्सेको छैन ।

त्यो कमालको फुच्चे उनै काकू बाबु भनेर विराटनगरमा चिनिने नित्यराज कोइरालाका पुत्र अनीष कोइराला हुन् । २०१७ सालअघि वी.पी. प्रधानमन्त्री हुँदा अनीषका पिताजी रामेछाप जिल्लाको तत्कालीन सि.डि.ओ. थिए । वी.पी.कै अनुसरणमा हिंड्यो भनेर २०१७ सालमा उनलाई देश निकाला गरियो ।

देश निकाला भएपछि उनको ढिलो बिहे भयो । २०२७ सालमा त मेरो जन्म भयो भनेर अनीषले बताए । रगतमा राजनीतिको रंग भए पनि कलाकारितामा अनीष यसरी तानिए कि थाहै भएन । कसरी उनी निर्देशकसम्म बने भनेर आज पनि अचम्म मान्छन् । विराटनगरको जलजला हलमा "सुन मेरी लैला" नामक हिन्दी सिनेमा चल्दा उनले आफ्नो साइकल बेचेर आठ पल्ट उक्त फिल्म हेरेका थिए ।

सिनेमाको आकर्षाले उनलाई यसरी तान्यो कि नौ वर्षो त्यो उमेरमा बर्म्बईका कलाकारलाई भेट्न बाउको पैसा डेढ सय रुपियाँ चोरेर रेल चढे । पटनामा उनी लुटिए र बीस रुपियाँ मात्र बाँकी भएपछि उनी नेपाल नै फर्किनु पर्‍यो ।

पिताजी राजनीतिमा लागेका र ठेक्कापट्टा लगायत समाज सेवामा पनि लागेको मान्छे भएको कारण थुप्रै किसिमका मान्छेहरुको घरमा आवत-जावत भइरहन्थ्यो । नेताहरुको त सधैंजस्तो भीड हुन्थ्यो । मिनी कांग्रेस कार्यालय जस्तो भइरहने घर तथा नेताहरुको संगतले उनमा पनि राजनीतिको रंग चढेको थियो । महेन्द्र मोरंग क्याम्पस पढ्दा कैयौँपल्ट उनले स्ववियु चुनाव पनि लडेका थिए । तर अनेरास्ववियूसँग उनको कडा प्रतिस्पर्धा हुने हुनाले उनी कलेज राजनीतिमा सधैँ पछारिन्थे ।

राजनीतिमा हार नै सिनेमामा रुचि बढाउन थाल्यो । यदि उनी त्यसबेला स्ववियू चुनावमा जितेका हुन्थे भने आज कांग्रेसको राम्रै नेतामा गनिन सक्थे । तर उनको दिमागमा अरु नै थियो । त्यसैबेला विराटनगरमा नेपाली चलचित्र पिरतीको शुटिङ हुँदै थियो । गौरी मल्ल, नवीना केसीलगायतका चालु स्टारहरुको जमघटले त्यहाँ रमझम थियो । उनी क्याम्पसका हिरो थिए । केटीहरु अघिपछि लाग्थे ।

त्यो बेलामा शुटिङ हेर्न जाँदा भीडबाटै पिरतीका निर्देशक चन्द्रप्रकाश घिमिरेले हिन्दीमा बोल्दै भने- "आप आइए- फिल्म खेलिए ।" उनी हुलमुलको पासिङ सीनमा देखिए । लामै रोल पाइएला भनेर दिनदिनै पिरतीको शुटिङ हेर्न जाने गर्दथे । तर, कसैले पनि उनिमाथि ध्यान दिएन ।

सोही समयमा उनको आँखा भारतीय अंग्रेजी पत्रिका स्क्रीनमा कलाकारको आवश्यकता सम्बन्धी विज्ञापन पढे । त्यही विज्ञापनअनुसार दर्खास्त पनि दिए । सेलेक्ट भएको चिठ्ठी पनि आयो । त्यो दिन नै उनको लागि ज्यादै खुशीको क्षण बन्यो । हिरो बन्न बाउको कोटको खल्तीबाट एक हजार चोर्दा पनि पैसा नपुग्ला भनेर नाडीको डोल्मा घडी बेचेर बर्म्बई पसे । त्यसरी दुःख गरेर बर्म्बईको त्यो ठेगानामा उनी पुगे जुन ठेगाना पत्रिकाले छापेको थियो तर त्यहाँ पुगेपछि उनी खङ्ग्रङ्ग भए । त्यो फिल्म प्रोड्युसरले त उनलाई- "छोकडी भी मिलाओ, तीस हजार पैसे भी लाओ-आप हिरो जरुर हो जाओगे ।"

हिरो बन्न गएको छोरो भावनात्मक रुपमा लुटिएपछि घर जाने हिम्मत पलाएन । त्यहाँबाट फनक्क फर्केर सीधै काठमाडौं आए । मध्यरातमा न्यूरोडस्थित साथीको डेरामा पुगे । टेन्सनमै रात कट्दै थियो । त्यति नै बेला काठमाडौंमा कोलाहल मच्चियो । सबै दगुरा-दगुर गरे । महाभूकम्प गएको रहेछ । त्यो दिन थियो २०४५ साल भदौ ५ गते । चलचित्रकर्मी शैलेस आचार्य उनको मामाको छोरीको श्रीमान् भएकोले आचार्यमार्फ नेपाली चलचिकर्मीहरुलाई भेट्ने तथा परिचय गर्ने अवसर उनले पाए । सरोज खनाल, भुवन के.सी., नारायण पुरी, सुनील पोखरेललगायतका नामी हस्तीहरुसँग भेट भयो । उनी दङ्ग थिए त्यो दिन पनि ।

बर्म्बईमा हिरो बन्न जाँदा त्यसरी धोका खाएर फर्केको मान्छे भएकोले हिरो बन्ने जरो नै हट्यो । राज कपुर, बी.एस. चोपडा, गुरुदत्त, सुभाष र्घइजस्ता निर्देशकको क्रेजका कारण उनलाई निर्देशक बन्ने रहर जाग्यो । २०४५ साल फाल्गुण ७ गते फेरि बर्म्बई हानिए उनी । निर्देशन कार्य सिक्न ठूल-ठूला व्यानर खोज्न थाले । कहींकतै प्रवेश पाउन उनले सकेनन् । गुजाराका लागि होटलमा जागिरे भएर काम गर्न थाले । को-स्टारहरुको हुलमुलमा उनले नटराज स्टुडियो छिर्ने मौका पाए । उक्त स्टुडियोमा एकसे एक ठूला फिल्म प्रोडयुसरहरुको अफिस देखे । उनले मन थाम्न सकेनन् ।

उनले धेरै फिल्म व्यानरको अफिसमा जान खोज्दा कसैले पनि पस्न दिएनन् । उनको कुरोलाई पूरै बेवास्ता गरिदिए । तर उनले हार खाएका भने थिएनन् । विधु विनोद चोपडाको अफिसमा पुग्दा भने, नेपाली भएको कारण राम्रै "रेस्पोन्स" भयो । विधु-विनोद चोपडाले उनको निर्देशक बन्ने चाहना सुनेपछि आफ्नो चेलो बनाउन तयार भए । चोपडाद्वारा निर्माण गर्न लागेको परिन्दामा उनलाई सहायक निर्देशक नै बनाइयो । परिन्दा ग्रुपमा नेपाली क्यामेरामेन विनोद प्रधानलगायत पिरतीका निर्देशक चन्द्रप्रकाश घिमिरे पनि काम गर्दै गरेको पाउँदा उनी झनै रमाए । आधाजसो टेक्निसियनहरु नेपाली नै हुँदा उनलाई काम गर्न र सिक्न सजिलो भयो ।

परिन्दापछि मजिहर खानको ग्याङ्ग, देवल देको चन्द्रमुखी, दीपक पवारको प्लेटर्फम, नवेन्द्र घोषको द व्लाइन्ड वीटनेस, धर्मेश दर्शनको लुटेरे, विधुविनोद चोपडाकै १९४२ ए-लव स्टोरीलगायतका फिल्महरुमा सहायक निर्देशनको अलावा केही म्युजिक भिडियो निर्देशन गरेर त्यहाँ पूर्ण बन्दै थिए । त्यति नै बेला बर्म्बईमा नेपालबाट गीत रेकर्ड गर्न गइरहने संगीतकार शम्भुजीत बासकोटाले बारम्बार नेपाल फर्कन सम्झाई रहे । बासकोटाले नै नेपाल ल्याएर उनकै चलचित्र जालीरुमालमा पहिलोपल्ट निर्देशनमा ब्रेक दिए । बासकोटाकै कारण उनी नेपाल फर्केका थिए ।

जाली-रुमालपछि आघात, सुपरस्टार र मितिनी नामक चलचित्रहरु उनले निर्देशन गरे । वर्षा एउटै भए पनि नेपाली फिल्म इन्डष्ट्रीमा क्वालिटी फिल्म दिने उद्देश्यले आफ्नै ब्यानरमा चलचित्र "के भो लौन नि" बनाए । तर यो चलचित्र यति फ्लप भयो कि उनी अहिले सिनेमा उद्योगबाट नै टाढिनु पर्‍यो ।

 
Click Here To Read Previously Posted Article    Click Here To Read Next Article          
 
More on Biography
Related Tags:
निर्देशक रोचक क्या बात ! कन्ट्रोभर्सी पेज 3 नवीनता ग्ल्यामर फिल्म फेस्टिबल पार्टी अभिनेत्री रोमान्स घोषणा सोच कार्यक्रम अभिनेता सेक्स सञ्चारकर्मी प्रविधि
Browse Tags in Other Group
 
 
Tags in Relationship
sex dating divorce cheating kissing marriage honeymoon friends tips gifts breakup infidelity parties know women attracting girls know men attracting guys flirting love personal valentine's day ex-love occassion fun read memories Family
Browse all Tags in Group